ఆయన రెక్కల క్రింద నీకు ఆశ్రయము కలుగును

✝️ *CHRIST TEMPLE-PRODDATUR*

-ఆయన రెక్కల క్రింద నీకు ఆశ్రయము కలుగును

ఆయన రెక్కల క్రింద నీకు ఆశ్రయము కలుగును.. -కీర్తనలు 91: 4

ప్రియ సహోదరీ సహోదరులారా మన దేవుడు తప్ప ఆశ్రయదుర్గమేదియూ లేదు దేవున్ని తప్ప ఎవర్ని ఆశ్రయించిన నిరాశ తప్ప ఏ విధమైన ప్రయోజనం ఉండదు..

ఆనాడు నయోమి దేవుడున్న సమృద్ధియైన బెత్లేహేము అనే స్థలము నుండి కొంత కాలం కరువు వచ్చిందని దేవుని గురించి తెలియని మోయాబీయుల దేశానికి వెళ్ళి తన భర్తను పిల్లలను సర్వస్వాన్ని కోల్పోయింది.. చివరకు దేవుడు బెత్లేహేమునకు ఇచ్చిన సమృద్ధిని చూసి తాను తిరిగి దేవుడున్న స్థలమైన బెత్లేహేముకు వచ్చి ఆశ్రయాన్ని పొందింది..

ఈరోజు నువ్వు దేవున్ని నమ్ముకొని ఆయననే ఆధారం చేసుకున్నందుకు కొంత కాలం కష్టం, నష్టం, బాధలు, అవమానాలు గుండా వెళ్తున్నావని బాధపడకు. నీవు దేవుని రెక్కల నీడ నుండి ప్రక్కకు వెళ్లినట్లయితే కచ్చితంగా సాతాను సిద్ధంగా ఉంటాడు నిన్ను సర్వనాశనం చేయడానికి..అందుకే దేవుని నీడ నుండి పక్కకు వెళ్లకు. సంఘంలో అంటు కట్టబడి వుండు.

ప్రార్థనాపరులైన షద్రక్ మేషక్ అబెద్నగో లకు ఎలాంటి కష్టం వచ్చింది తెలుసా అగ్ని గుండంలో పడేశారు. ప్రియమైన దేవుని బిడ్డా కష్టం , నష్టంకు దేవుడు అనుమతి ఇచ్చాడు కానీ ఆ సమస్యలో దేవుడు తోడు వుండి కాపాడినాడు, మరియు ఆ సమస్య ద్వారా దేవుడు మహిమ పొందాడు. ఇప్పుడు నీకు వున్న సమస్యల నుండి దేవుడు నిన్ను కాపాడతాడు అని నీకు నమ్మకం వచ్చిందా ? ఇప్పుడైనా దేవుని మీద విశ్వాసం వుంచి నడువు.. నీ సమస్యలలో నుండి యేసయ్య నిన్ను కాపాడగల సమర్థుడు అని నమ్మకం వుంచు. ఏ కష్టపరిస్థితి ఎదురైనా దేవుడ్నే నువ్వు ఆధారం చేసుకున్నప్పుడు దేవునికి ప్రార్ధించినప్పుడు ఖచ్చితంగా ఏ కీడు నీ ధరిచేరకుండ దేవుడు తన రెక్కల క్రింద నిన్ను కప్పి నీకు ఆశ్రయంగా ఉంటారు కనుక ఏ స్థితైనా సరే ఆయన రెక్కల నుండి ప్రక్కకు జరగని జీవితం కోసం దేవునికి ప్రార్ధిద్దాం..!! ఆమెన్.

✝️ *CHRIST TEMPLE-PRODDATUR*