ఇష్టానుసారంగా జీవిస్తే ఎలా..?

🕎 CHRIST TEMPLE-PRODDATUR

Telugu Bible Sermons by Pastor Nakkolla Daniel Balu

          ఇష్టానుసారంగా జీవిస్తే ఎలా..?

"ధనవంతుడొకడుండెను. అతడు ఊదారంగు బట్టలును సన్నపు నార వస్త్రములును ధరించుకొని ప్రతి దినము బహుగా సుఖపడుచుండువాడు. లాజరు అను ఒక దరిద్రుడుండెను. వాడు కురుపులతో నిండినవాడై ధనవంతుని యింటి వాకిట పడియుండి... " లూకా సువార్త 16:19 నుండి 31 వరకు.

✴️అప్పుడు ఆ ధనవంతుడు పాతాళంలో యాతనపడుతూ పైకి తేరి చూసి దూరంగా ఉన్న అబ్రాహామునూ, అతనికి సన్నిహితంగా ఉన్న లాజరునూ చూసి౼"తండ్రీ అబ్రాహామూ! నన్ను కరుణించు. నేను ఈ మంటల్లో అల్లాడిపోతూ ఉన్నాను. లాజరు తన వేలి కొనను నీళ్ళలో ముంచి నా నాలుకపై చల్లడానికి అతణ్ణి పంపు" అని కేకలు పెట్టాడు
అబ్రాహాము-"నాయనా, గుర్తుందా? నువ్వు జీవించి ఉన్నప్పుడు నీకిష్టమైన వాటిని నువ్వు అనుభవించావు. అప్పుడు లాజరు ఎన్నో కష్టాలు పడ్డాడు. ఇప్పుడు ఇక్కడ అతడు సేద దీరుతున్నాడు. నువ్వు యాతన పడుతున్నావు.."
అప్పుడతడు౼‘అలాగైతే తండ్రీ, నాకు ఐదుగురు సోదరులున్నారు. వారు కూడా ఈ వేదనకరమైన స్థలానికి రాకుండా సాక్ష్యం ఇవ్వడానికి లాజరును వారి దగ్గరకు పంపించమని నిన్ను వేడుకుంటున్నాను’ అన్నాడు.
అబ్రాహాము౼‘వారి దగ్గర మోషే, ప్రవక్తలూ ఉన్నారు. నీ సోదరులు వారి మాటలు వినాలి’ అన్నాడు.
అతడు౼‘తండ్రీ, అబ్రాహామూ అలా అనకు, చనిపోయిన వారిలో నుండి ఎవరైనా వెళ్తే వారు తప్పక పశ్చాత్తాపపడతారు’ అన్నాడు. అబ్రాహాము అతనితో, ‘మోషే, ప్రవక్తలూ చెప్పిన మాటలు వారు వినకపోతే చనిపోయిన వారిలో నుండి ఎవరైనా సజీవంగా లేచి వెళ్ళినా నమ్మరు’ అన్నాడు ✴️

■ ధనవంతుడు ఎల్లప్పుడూ తన శరీరక సుఖాలపైనే దృష్టి పెట్టాడు. మంచి బట్టలు, సుఖజీవనం, విందులు, విలాసాలు మె||. ఒక్కసారి కూడా తనలో ఉన్న ఆత్మ గురించి, సమస్తానికి మూల కారకుడైన దేవుని గురించి ఆలోచించలేదు. నమ్మకమైన సేవకుడైన ప్రతి వాడూ తన యజమాని మాటకు విధేయులుగా ఉంటారు కదా! ఎందుకంటే అతని ద్వారా పోషించబడుతున్నారు గనుక. అదేవిధంగా సృష్టికర్తయైన దేవుని ద్వారా ఉనికిలోకి వచ్చిన మనమంతా దేవుని మాట వినడానికి, ఆయన అధికారం క్రింద లోబడి జీవించవల్సిన వారము కదా! ధనవంతుడు అన్యాయంగా సంపాదించినట్లు ఏక్కడా చెప్పబడలేదు కానీ దేవుణ్ని విస్మరించి (జీవిత పరమార్థం విడిచి) తనకు ఇష్టమొచ్చినట్లు బ్రతికాడని మాత్రమే వ్రాయబడివుంది. మన జీవితంలో గడిచిపోయే ప్రతి క్షణం, మన సృష్టికర్తను కలుసుకోవడానికి దగ్గరౌతున్నామని గుర్తు చేస్తుంది. అతడు బ్రతికున్న రోజుల్లో దేవుని ప్రవక్తల మాటలు అనేకసార్లు చెవిన పడే ఉంటాయి. తనకు ఇంకా సమయం ఉందనుకుంటూ భ్రమలో జీవించాడు. "నేను ఎవరికి అన్యాయం చెయ్యలేదు, భక్తిగల వంశం(కుటుంబం)లో పుట్టాను, నా క్రింద అనేక మంది సేవకులు బ్రతుకుతున్నారు, నా కుటుంబ సభ్యులు, బంధుమిత్రులు నన్ను ఎంతో అభిమానిస్తారు" అనుకొని ఉండొచ్చు. ఐతే ఒకడు దేవుని ఏలుబడి క్రింద జీవించడానికి ఇష్టపడక తనకు నచ్చినట్లు బ్రతకడమే పాపం.

■ మీరు చదువుతున్న పై మాటలు పరిశుద్ధ గ్రంథమైన బైబిల్లోనివి. ఇది అబద్దమాడని పుస్తకం. పరదైసు(పరలోకం)-పాతాళం(నరకం) అనేవి రెండు వాస్తవమైన ప్రదేశాలు. దేవుడు వాటిని గూర్చి మనుష్యులకు మరుగు చెయ్యలేదు. దేవుని చేత తరతరాలుగా ఈ మాటలు ప్రకటించబడుతూనే ఉన్నాయి. ఒకసారి ప్రవేశించాక తిరిగి సరిదిద్దుకోలేని, మరళా భూమిపైకి రాని ప్రదేశాలావి. "నేను" అని నువ్వు పరిచయం చేసుకుంటున్నది, నీలో ఉన్న "నీ ఆత్మను" గురించే. ఒకరోజు ఈ శరీరం కనుమరుగు అవుతుంది. "నేను" అనబడే ఆ ఆత్మ దేవుని ముందు నిలుచుంటుంది. ఈ శరీరంతో చేసిన ప్రతి తప్పును దేవుడు విమర్శించే సమయం రాబోతుంది. ఏది శాశ్వితం అంటూ భ్రమ కలిగిస్తుందో, అదే అశాశ్వితమైనది(ఈ లోకం). వీటి గూర్చి నువ్వు వింటున్నావో అవే శాశ్వితమైనవి. ఇవి బైబిలోని పరిశుద్ధుడైన దేవుని మాటలు.

■ నేస్తమా! దేవుడు నిన్ను ప్రేమిస్తున్నాడు. నిన్ను శిక్షించడంలో కంటే క్షమించడంలోనే ఆయన ఆసక్తిని కలిగివున్నాడు. మన కోసం దేవుడు ఏర్పాటు చేసిన ఆయన కుమారుడును, మన రక్షకుడైన యేసుపై నీ పాపమంతటిని మోపాడు. సిలువపై ఆయనే నీ పాపాలన్నీ చేసినట్లుగా చూసాడు. న్యాయంగా నీకు రావాల్సిన ఉగ్రతనంతా(శిక్షను) క్రీస్తే భరించునట్లుగా చేసి నిన్ను రక్షించుకోవాలని ఆశించాడు. క్రీస్తు నీ జీవితకాలంలో చేసిన, చెయ్యబోవు ప్రతి పాపానికి రావాల్సిన శిక్షను సంపూర్ణంగా చెల్లించాడు.ఎవరైతే రక్షకుని ఆశ్రయించి, ఆయన్ను అంగీకరిస్తారో వారు క్రీస్తు రెక్కల చాటున దేవుని ఉగ్రత దినమందు దాయబడతారు. తనలో ఉన్న ప్రతి ఒక్కరిని క్రీస్తు కాపాడుకోగల సమర్థుడు. ఈ మాటలు నీవు అంగీకరించి, నిన్ను ఒప్పిస్తున్న దేవుని ఆత్మతో ఏకీభవిస్తే రెప్పపాటున నీ జీవితం(భూమిపై & నిత్యత్వంలో) శాశ్వితంగా మారిపోతుంది. క్రీస్తు వలె నీవు కూడా పరమతండ్రి బిడ్డవౌతావు. లాజరు వలె శ్రమలోను-భాధల్లోనూ, ఏమున్నా-లేకున్నా దేవుణ్ణి కలిగి జీవించగిలిగే నిజమైన జీవితంలోకి, దేవుని ప్రణాళికలను గౌరవించే జీవితంలోకి వస్తావు.

స్నేహితుడా! ఈ మాటలు నీ నిత్యజీవాన్ని నిర్దేశించే మాటలు...

అట్టి కృప ధన్యత దేవుడు మనకు అనుగ్రహించును గాక.

CHRIST TEMPLE-PRODDATUR
         Pastor.N.Daniel Balu
              @8142229661

దేవుడు మనపక్షముననుండగా మనకు విరోధియెవడు?

🕎 CHRIST TEMPLE-PRODDATUR

Telugu Bible Sermons by Pastor Nakkolla Daniel Balu

దేవుడు మనపక్షముననుండగా మనకు విరోధియెవడు?

❇ దేవుడు పౌలు చేత అసాధారణమైన అద్భుతాలు చేయించాడు. అతని శరీరానికి తాకిన చేతి గుడ్డలైనా, నడికట్లయినా రోగుల దగ్గరికి తెస్తే వారి రోగాలు పోయాయి, దయ్యాలు కూడా వదలిపోయాయి. అప్పుడు, దేశసంచారం చేస్తూ దయ్యాలను వెళ్ళగొట్టే యూదులు కొందరు, దయ్యాలు పట్టిన వారిపై౼“పౌలు ప్రకటించే యేసు పేరిట ఆజ్ఞాపిస్తున్నాం” అని యేసుప్రభువు పేరు చెప్పడానికి పూనుకొన్నారు.
స్కెవ అనే ఒక యూదు ప్రధాన యాజకుని కొడుకులు ఏడుగురు అలా చేశారు. ఆ దయ్యం వారితో౼“నాకు యేసు ఎవరో తెలుసు, పౌలు కూడా తెలుసు గాని, మీరెవరు?” అంది. ఆ దయ్యం పట్టినవాడు ఎగిరి వారిమీద పడి వారిని లొంగదీసుకోవడంతో ఆ దురాత్మ గెలిచింది. అందుచేత వారు గాయాలతో బట్టల్లేకుండా ఆ ఇంటి నుండి పారిపోయారు ❇

■ యూదా మతస్తుడైన పౌలు ప్రభువును తెలుసుకోక ముందు ఎంతో భక్తిపరునిగా, మతాసక్తి గల వానిగా ఉన్నాడు(ఫిలిప్పీ 3:6). ఆ సమయంలో అతని జీవితంలో ఎలాంటి ప్రభావం లేదు. ప్రభువును తెల్సుకున్న తర్వాతే అతని ద్వారా దేవుడు ఎన్నో అద్భుతాలు చేయించాడు. దెయ్యాలు సైతం పౌలును గుర్తుపట్టాయి. ఒకడే వ్యక్తి..! కానీ అతని జీవితంలో ఎంతో తేడా కనిపిస్తుంది. కారణం..పౌలు దేవుణ్ని తెల్సుకున్నాడు-దేవుని చేత తెల్సుకోబడివున్నాడు(దేవునికి మనమంతా తెల్సు. అలాగే, మనందరికీ కూడా దేవుడెవరో తెల్సు. ఆ తెలియడం కాదు! పుస్తక జ్ఞానం అంతకంటే కాదు). 'తెలియబడటం' అంటే అత్యంత సమీపంగా, ఆయన ఏమైవున్నాడో, ఎలాంటి వాడో అనుభవపూర్వకంగా తెలుసుకోవడం(a close intimacy). మన జీవితమంతటిపై దేవుని సంపూర్ణ అధికారానికి ఇష్టపూర్వకంగా అప్పగించుకొని, ఆయనకు లోబడి జీవించడం. అప్పుడు దేవుడు కూడా మన జీవితాల్లో స్వేచ్ఛగా సంచరించగల్గుతాడు. పౌలు దమస్కు లో ప్రభువు కలుసుకున్న తర్వాత, ఆయన్ను తెలుసుకోవడం మొదలుపెట్టాడు. దేవుణ్ని ఎరుగటమే ఈ జీవితంలో అన్నింటికంటే ప్రాముఖ్యమని గ్రహించాడు (గలతి 1:16,17; ఫిలిప్పీ 3:10,11). అలాంటి ఆసక్తిపరులకు దేవుడు కూడా తాను ఏమైవున్నాడో ఆయనంతట ఆయనే కనబర్చుకుంటాడు (యిర్మీ 29:13; సామె 8:17; రోమా 12:11).

■ ఎప్పుడైతే ఒకడు చీకటి నుండి వెలుగుకు దాటాడో, అంటే అంధకార అధికారం నుండి దైవ అధికారంలోకి వస్తాడో, దేవునితో పాటుగా, సాతాను-దురాత్మ శక్తులు అతణ్ని గుర్తిస్తాయి (యోబు 1:9; ఆది 3:1). మన బలాన్ని చూసి-భక్తిని చూసి అవి మనకు భయపడట్లేదు కానీ, మనపై ఉన్న దేవుని యెలుబడిని, అధికారాన్ని చూసి భయపడతాయి (రోమా 16:20). స్కెవ కుమారుల జీవితంలో ఇలాంటి అనుభవం లేదు. దేవుని అధికారం క్రింద ఉన్న వ్యక్తి చుట్టూ దేవుని కంచె, ఆయన భద్రత(కావలి) విస్తరించి ఉంటాయి. ఒక వ్యక్తి కటిక బీదరికంలో బ్రతకవొచ్చు (అవి దేవుడు నియమించే సరిహద్దులు) కానీ దేవుని అధికారం క్రింద జీవించే వ్యక్తిగా అతను వుండొచ్చు. దైవికమైన వ్యక్తి చేస్తున్న పరిచర్యను కొందరు అనుకరించవచ్చు కానీ దేవుని అధికారానికి లోబడకుంటే అక్కడ దైవాగ్ని(Fire of God) ఉండదు. అవే మాటలు వల్లించినా పరిశుద్ధాత్మ శక్తి అక్కడ ఉండదు. స్కెవ కుమారులతో దురాత్మ ప్రవర్తించినట్లుగా పౌలుతో ప్రవర్తించగలదా? పౌలు వారికంటే భౌతికంగా బలవంతుడనా? కాదు.పౌలు యేసులో తన ఉనికి(అడ్రస్) కలిగి ఉన్నాడు. పౌలు దేవుని అధికారంతో పంపబడి, అవన్నీ చేస్తున్నాడు.

★ ఇట్టి పరిచర్యలో స్వఘనతకు ఏమాత్రం తావు ఉండదు. దేవుని వాక్యాన్ని స్థిరపరచడానికి ఆ అద్భుతాలు, సూచక క్రియలను దేవుడు చేస్తున్నాడని, అది ఆయనే జరిగించు ఆయన పరిచర్య అని గుర్తిస్తాము. అత్యంత బలహీనుడైన విశ్వాసి కూడా దేవుని అధికారం క్రింద జీవిస్తూవున్నప్పుడు, దేవుణ్ని బట్టి బలవంతుడిగా అపవాది ముందు కనబడతాడు. అపవాది కంటే బలమైన శత్రువు ఎవరు? వాడినే దేవుడు మన పాదాల దగ్గర వుంచితే..ఇక ఈ లోకంలో బలమైనది ఏది? దేవుడు మన పక్షమున ఉండగా మనకు విరోధి ఎవరు? ఇది క్రీస్తు విజయం(1యోహా 3:8)..విశ్వాసం ద్వారా అది మనందరి స్వంతం. అది ఆయన కృపే!

అట్టి కృప ధన్యత దేవుడు మనకు అనుగ్రహించును గాక. ఆమెన్

CHRIST TEMPLE-PRODDATUR
         Pastor.N.Danie Balu.
         @ +91 8142229661

ఇదేంటి ! దుర్మార్గులే అభివృద్ధి అవుతున్నారు..?

🕎 CHRIST TEMPLE-PRODDATUR

Telugu Bible Sermons by Pastor Nakkolla Daniel Balu

ఇదేంటి ! దుర్మార్గులే అభివృద్ధి అవుతున్నారు..?

✴️ దేవుడు౼"నాకు విరోధంగా మీరు చాలా గర్వంగా మాట్లాడారు" "నిన్ను గూర్చి ఏమని మాట్లాడాం?"అని మీరు అడుగుతారు. "'దేవుణ్ని సేవించడం (సేవ చేయడం) వ్యర్ధం. ఆయన ఆజ్ఞలు పాటించి దేవుని సన్నిధిలో మనం దుఃఖాక్రాంతులుగా తిరుగుతూ ఉండడంవల్ల ఏమి ఉపయోగం? గర్విష్ఠులే దీవెనలు పొందుతున్నారు, దేవుణ్ణి పరీక్షించే దుర్మార్గులు భద్రంగా ఉంటూ వర్ధిల్లుతున్నారు" అని మీరు చెప్పుకుంటున్నారు.

అప్పుడు యెహోవా పట్ల భయభక్తులు గలవారు ఒకరితో ఒకరు మాట్లాడుకుంటున్నప్పుడు యెహోవా ఆ మాటలు విన్నాడు. యెహోవా పట్ల భయభక్తులు కలిగి ఆయన నామాన్ని గౌరవించే వారి గురించి జ్ఞాపకార్థంగా ఆయన సన్నిధానంలో ఒక పుస్తకం రాశారు. "నేను నియమించే రోజు సమీపించినప్పుడు వారు నావారుగా, నా ప్రత్యేక సొత్తుగా ఉంటారు. తండ్రి తనను సేవించే కొడుకును కనికరించే విధంగా నేను వారిని కనికరిస్తాను" అని సైన్యాలకు అధిపతియైన యెహోవా సెలవిస్తున్నాడు. (మలాకి 3:13-17) ✴️

■ దేవుడు సర్వజ్ఞాని. ఆయన ప్రతి పని వెనుక ఒక నిర్దిష్టమైన ఉద్దేశ్యం ఉంటుంది. దేవుడు ఆయన దగ్గరకు వచ్చే ప్రతి ఒక్కరిని పరిక్షిస్తాడు. (దీవెన/మేలుకు ముందు కాని లేదా దీవెన తర్వాత కాని). పరీక్షకు ముందు అందరూ ఒకే విధంగా కనిపిస్తారు(స్తుతిస్తారు) కానీ పరీక్ష అనంతరం మాత్రం దేవుడ్ని ప్రేమించేవారు మరియు దేవుని చేతిలో ఉన్న వాటినే ప్రేమించే వారుగా వేరు చెయ్యబడతారు. సహజంగా దేవుడు వివిధ విధాలుగా మనుష్యులను ఆయన సహవాసానికి పిలుచుకుంటాడు. కొన్నిసార్లు వ్యాధిభాధ బలహీనతలు, సూచక క్రియలు-మహత్కార్యాలు, సత్యానేషణ, మానసికంగా క్రుంగుదల మొ||. ఐతే దేవుణ్ని సేవించడంలో దీవెనలను ఆశించే వ్యక్తులు దేవుడు తమ భక్తికి పరిక్షపెట్టినప్పుడు తేలిపోతారు. వారు అన్యాయస్థులను, అవిశ్వాసులను లోకసంబంధమైన దీవెనలు పొందుకుంటున్నప్పుడు, వారి జీవితాల్లో ఆ మేలులు దొరకనప్పుడు 'మన భక్తి వల్ల ఏమి ప్రయోజనం, ఏమీ దొరకట్లేదు మన కంటే వాళ్లే నయ్యం' అనుకుని దేవునిపై తిరుగుబాటు చేస్తారు. తమ సొంత జీవితాలపై దేవుని యెలుబడి ఇష్టపడని, లోక సౌఖ్యల యందే మనస్సు పెట్టుకొను వారు, దేవుణ్ని అవసరానికి వాడుకునే ఒక యంత్రం లాగే చూస్తారు. వారు కోరుకున్నవి దొరికినంతకాలం భక్తిలో ఉంటారు, అవి దొరకనప్పుడు లోపల ఉన్న చెడిపోయిన వక్రబుద్దిని బట్టి దేవుని దూరమౌతారు. వారి స్వభావాన్ని బట్టి తిరిగి లోకంలో కలిసిపోతారు. పైన దేవుని వాక్యం చెప్పిన విధంగా దేవునికి కోపం పుట్టించి, నశించిపోయే వారిగా ఉంటారు.

■ కానీ కొందరు తాము ఏవిధం చేతనైనా దేవుని దగ్గరకు పిలువబడినప్పటికిని, అక్కడితో ఆగిపోక దేవుని శక్తిని చూసినవారై, యదార్థ హృదయులై దేవుడు ఎలాంటి వాడో, రక్షకుడు ఎందుకు వచ్చాడో, వాటిని గూర్చి వెలిగించబడి హత్తుకుంటారు. (ఇటువంటి మనస్సు గల వారిని దేవుడు జీవపు మాటలకు నడిపిస్తాడు) తర్వాత రోజుల్లో ఎన్ని లేమిలు ఉన్నా వారు దేవుణ్ని వదలరు. ఎందుకంటే వారు ప్రేమిస్తున్నది, వారి విశ్వాసం దేవుని చేతిలో ఉన్న వాటిపై కాదు గాని, దేవున్నే. ఈ విశ్వాసం బలమైనది, స్థిరమైనది మరియు నిష్కల్మషమైనది. దేవుణ్ణి వ్యక్తిగతంగా తెలుసుకున్నవారు కదల్చబడరు. అంత్య దినాన దేవుడు వారి దేవుడు అని చెప్పుకోవడానికి సిగ్గుపడడు. కొదువలతో దేవుడు వారిని పరీక్షించగా, వారు పలికిన విశ్వాస మాటలను దేవుడు భద్రం చేస్తాడు, ఒక రోజు వాటిని సమస్త మానవాళి ముందు బహిర్గతం చేస్తాడు. వారు దేవుని మంచితనాన్ని, శక్తిని తమకు అర్ధంకాని పరిస్థితుల్లో కూడా ఆయన్ను నమ్మి మహిమపర్చే వారిగా ఉంటారు.

■ మనుష్యులు దేవుని చేతిలో ఉన్న వాటినే ప్రేమించే వారుగా ఉండటానికి మరొక కారణం వారిని నడిపించిన భోధకులు! లోక కోరికలు తీరుతాయని, దేవుణ్ని నమ్మమని ఆశ చూపి పిలువగా, గుంపులు గుంపులుగా ప్రజలు దేవుని దగ్గరకు వస్తారు. అద్భుతాలు, సూచక క్రియల వంటి సాక్షాలతో ప్రజలను ఆకర్షిస్తారు. ఇలాంటి భోధకులు నేడు అనేకులు. క్రీస్తు, అపొస్తలులు ఎన్నడూ ఇలా పిలువలేదు. వారు దేవుని రాజ్యాన్ని గూర్చి మాత్రమే ప్రకటించారు. నిజంగా అవసరతల్లో ఉండి వచ్చిన ప్రతి ఒక్కరినీ దైవ చిత్తానుసారం మేలు చేశారు. దేవుని వాక్యాన్ని స్థిరపర్చడానికే ఈ సూచకక్రియలను దేవుడు వాడుకున్నాడు. 'దేవుని రాజ్యం' అంటే పరలోక పట్టణం అని కాదు గాని, దేవుడు ఏలే ప్రదేశం. అది మొదట మన హృదయం(జీవితం). భూమిపై మనలో దేవుని పరిపాలన లేకుండా దేవుని పట్టణం (పరలోకరాజ్యం) లోకి కూడా ప్రవేశించలేము.

కావున అన్యాయస్తులు , దుర్మార్గులు, గర్విష్టులు అభివృద్ధి అయ్యి.. మేడలు మిద్దెలు కడుతున్నప్పుడు, మనదగ్గర ఏమీ లేదని నిరుత్సాహ పడకుండా రాజులకు రాజు అయిన యేసయ్య మనతో వున్నాడని గ్రహించి , దేవుడు మనల్ని దీవించే సమయం కోసం నిరీక్షణ కలిగి , పరిపూర్ణ విశ్వాసంతో ప్రభువును మహిమపరుద్ధాం.

అట్టి కృప ధన్యత దేవుడు మనకు అనుగ్రహించును గాక. ఆమెన్.

CHRIST TEMPLE-PRODDATUR
Pastor. Nakkolla. Daniel Balu
☎ +91 8142229661

నీతో స్నేహం

🕎 CHRIST TEMPLE-PRODDATUR

Telugu Bible Sermons by Pastor Nakkolla Daniel Balu

         నీతో స్నేహం

❇ దేవుడు ఇశ్రాయేలీయులతో౼"మహా యెండకు కాలిన అరణ్యములో నీతో స్నేహం చేసిన వాడను నేనే! నేను వారికి ఆహారం ప్రసాదించినప్పుడు వారు తిని తృప్తిపడ్డారు. తృప్తిపడి గర్వించారు.అప్పుడు వారు నన్ను మరచిపోయారు"(హోషేయా 13: 5) ❇

▪ లోకం వారి వైపు చూసినప్పుడు వారిలో ఏ అర్హత కనిపించదు. అలాంటి మనుష్యులతో స్నేహం చెయ్యడానికే దేవుడు ఇష్టపడతాడు. ఏ హృదయానికి ఓదార్పు, జాలి, ప్రేమలు అవసరమౌతాయో వారిని దేవుడు వెతుక్కుంటూ వెళ్తాడు. మన మధ్యలో ఉన్న అత్యంత బలహీనులైన వారి చుట్టూ దేవుని కృప విస్తరించి ఉంటుంది అని కనిపెట్టగలవా? బయటికి కనిపించే చక్కటి విలువలతో ఉంటే మనమేంటి, ఈ లోకం కూడా స్నేహం చేస్తుంది కదా! క్రీస్తు కూడా సుంకరులను,పాపులను, వ్యభిచారులను, కుష్ఠురోగులను, జక్కయ్య వంటి తిరస్కరించబడిన వారిని, చదువులేని జాలరులను, దేవుని పట్ల యదార్థవంతులను, చివరికి సిలువపై ఉన్న నేరస్తున్ని, లోకరీత్యా అల్పులు, హీనులతో కలిసి నడిచాడు, వారితో స్నేహం చేశాడు. క్రీస్తులోని పరిశుద్ధత బలహీనులను అంగీకరిస్తూ, నిరీక్షణనిస్తుంది. పరిసయ్యుల భక్తికి, క్రీస్తుకు ఉన్న తేడా అదే! అర్హతలను బట్టి దేవుడు స్నేహం చేసిన్నట్లేతే, నిన్ను-నన్ను దేవుడు ఎప్పుడో దాటిపోయివుండేవాడు. ఈ విషయంలో నీవు కూడా నాతో ఏకీభవిస్తావనుకుంటున్నాను!

▪ మన రక్షకుడు నడచిన మార్గంలో మనం నడవాలని ఆయన ఆదేశించలేదా? కృపను పొందుకున్నాం! కాబట్టి ఇతరులకు ఇవ్వాల్సిన బద్ధులమైవున్నాము. ఒకవేళ క్రీస్తు మన స్థానంలో జీవిస్తునట్లేతే, మనం నిర్లక్ష్యం చేసిన అనేకులను ఆయన హత్తుకొని ఉండి ఉంటాడు.

▪మనం దోషాలను-బలహీనతలను విశ్లేషించడంలో ప్రావీణులం అవ్వాలని దేవుడు చూడట్లేదు, కానీ యదార్థవంతులైన ప్రతి ఒక్కరికి సహాయకులంగా (క్రీస్తును పోలి) ఉండాలని దేవుడు పిలుస్తున్నాడు. ఇది క్రీస్తు పరిచర్య. 

▪మనం ఇతరుల దోషాలను లోతుగా విశ్లేషించి వెతకడం-పట్టడం, మనస్సులో ఒక స్థిరమైన నిర్ధారణకు రావడమే మన పరిచర్య ఐతే, అది మతసంబంధులైన పరిసయ్యుల పరిచర్య.

▪ ఆయన తన మహా పరిశుద్ధతలో నుండి మనుష్యులకు తీర్పు తీర్చాలను కోవట్లేదు! కానీ ఆ వ్యక్తి స్థానంలో నిలువబడి, విస్తారమైన కృపతో జాలిని నిలిపి, అసహ్యమైన జీవితాన్ని సైతం భరించి, క్షమించి, హత్తుకోవాలనుకుంటాడు (హృదయపూర్వకంగా ఆ అపరాధాన్ని అంగీకరించు వారి విషయం గూర్చి చెప్తున్నాను). విశ్వాసులమైన మన జీవితంలో ఎన్నో సార్లు చేసిన తప్పులనే (బలహీనతలనే) పదే పదే చేసి త్రొటిల్లినప్పుడు దేవుడు మనల్ని హత్తుకోలేదా? వాటిని గుర్తు చేసుకొని ఇప్పుడు ఎదుటి వారిని చూడు, వారి బలహీనతలు ఎంత స్వల్పంగా ఉంటాయో! ఉన్నపాటున (బలహీనతలతోనే) అంగీకరించడం దేవుని లక్షణం.

▪పౌలు-"కాబట్టి బలమైన విశ్వాసం కలిగిన మనం, మనల్ని మనమే సంతోషపెట్టుకోకుండా, విశ్వాసంలో బలహీనుల లోపాలను భరించాలి" (రోమా 15:1)
ఒకడు తను బలవంతుడని భావిస్తే బలహీనుడు మోయ్యలేని భారాన్ని సైతం మోయగలగాలి కదా! లేదంటే వాడు కూడా బలహీనుడని దానర్ధం. అలానే తోటి వ్యక్తులను బలహీనతలతోనే హత్తుకునేవాడే నిజమైన బలవంతుడు. క్రీస్తు బలవంతుడు!

▪ దేవున్నుండి బలం పొందుకొని, లోకం చేత బలహీనులుగా పిలువబడే వారితో స్నేహం చెయ్యడానికి, వారిని వారిగానే అంగీకరిస్తూ, క్రీస్తు పొలికగా మార్చడానికి బలవంతులుగా తయారుచెయ్యడం కోసం, క్రీస్తు మాదిరిని మనలో ధరించడానికి సిద్ధంగా ఉండాలి. దేవుడు ఆ విధంగా మనల్ని ఆయన కొరకు ఒక రాజ్యంగా కట్టును గాక!

అట్టి కృప ధన్యత దేవుడు మనకు అనుగ్రహించును గాక.

CHRIST TEMPLE-PRODDATUR
Pastor.N.Daniel Balu.

నేను ఒంటరిని కాదు..

🕎 CHRIST TEMPLE-PRODDATUR

Telugu Bible Sermons by Pastor. Nakkolla Daniel Balu

                    నేను ఒంటరిని కాదు..

❇ సాయంత్రమైనప్పుడు యేసు తన శిష్యులతో ౼“సముద్రం అవతలి ఒడ్డుకు వెళ్దాం పదండి!” అన్నాడు. శిష్యులు జనసమూహాలను విడిచి యేసుతో పడవలో బయలుదేరారు.
వారు ప్రయాణమయ్యాక ఆయన నిద్రపోయాడు. ఈలోగా సముద్రంపై బలమైన గాలివాన వచ్చి పడవలోకి నీళ్ళు వచ్చేశాయి. వారి స్థితి ప్రమాదకరంగా మారింది.

కాబట్టి వారు ఆయన దగ్గరికి వచ్చి౼“ప్రభూ! ప్రభూ! నశించిపోతున్నాం!మేము మునిగిపోతుంటే నీకేమీ పట్టదా?” అంటూ ఆయనను లేపారు. ఆయన లేచి, గాలినీ, ఉవ్వెత్తున లేచే కెరటాలను గద్దిస్తూ, “శాంతించు! ఆగిపో!” అని ఆజ్ఞాపించాడు.. అవి అణిగిపోయి అంతా నిశ్శబ్దంగా అయింది.

అప్పుడు ఆయన౼“మీ విశ్వాసం ఎక్కడ?” అన్నాడు. వారు భయపడి, “ఈయన గాలికీ నీళ్లకూ ఆజ్ఞాపిస్తే అవి లోబడుతున్నాయి. ఈయన ఎవరో” అని ఒకరితో ఒకరు చెప్పుకుంటూ ఆశ్చర్యపోయారు(మార్కు 4:35-40) ❇

■ దేవుడు తోడున్న పడవపైకి గాలివాన-తుఫానులు(శ్రమలు) వస్తాయా? ఖచ్చితంగా వస్తాయి! ఇంకా చెప్పాలంటే ఆయనే (శ్రమలను) పంపుతాడు! ఈ సంఘటనకు ముందు యేసు శిష్యులకు అనేక పరలోక సత్యాలను భోధించాడు (మార్కు 4:33,34). అదే రోజు సాయంత్రం ఆయనే వారిని ఈ ప్రయాణానికి పిలిచాడు. ఇప్పుడు వారి ముందున్న యేసు(దేవుని) మాట౼"అవతలి ఒడ్డుకు వెళ్దాం!". కానీ కొద్దిసేపటి తర్వాత తీవ్రమైన తుఫాను చెలరేగి, పడవ మీదికి అలలు ముంచుకొచ్చాయి. అటువంటి సమయంలో..'మన జీవితం' అనే పడవలో చెలరేగే తుఫానులను మనమే పరిష్కరించుకోవాలని భావిస్తే భయానదోళనలే కలుగుతాయి. అవి కొన్నిసార్లు మన శక్తికి మించినవి. 'నేనే దీన్ని పరిష్కరించుకోవాలి' ౼ 'నేనే'-అనే మానవ బలం నుండి బయటకి వచ్చి, 'నేను ఒంటరిని కాదు, నా దేవుడే నా సహాయకుడు' (ఆయనకు తెలిసే,ఆయన పంపగా ఈ తుఫాను వచ్చింది)అనే దైవబలంలోకి విశ్వాసంతో ప్రవేశిస్తూ..శ్రమలో చెయ్యి విడువని, దేవుని విలువైన ఆధ్యాత్మిక పాఠాలను శ్రద్ధగా నేర్చుకుంటూ ఆధారపడవాల్సిన వారమైవున్నాము(ఇది మాట పలికినంత సుళువు కాదని నాకు తెల్సు!నమ్మకస్థుడైన దేవుడు మనల్ని చెయ్యి విడువక, నడిపిస్తాడని మాత్రం నాకు తెల్సు!).

■ శిష్యులు-'మేము దేవుణ్ని బట్టి విశ్వాసంతో సమస్తాన్ని వదులుకున్నాం' అనుకుంటున్నారు కానీ శ్రమ వచ్చేవరకు తెలియదు,వారింకా అల్పవిశ్వాసంతోనే ఉన్నారని! 'శ్రమ'-మన నిజమైన ఆధ్యాత్మిక స్థితిని తెలియజేస్తూ,మనపై మనకున్న సొంత అభిప్రాయాలను తొలగిస్తుంది. దేవునితో నడిచే జీవితం..ఒక విద్యార్థిని పోలినట్లుగా 'సత్యాన్ని గూర్చిన వెలిగింపుతో పాటుగా, పరీక్షా అనుభవాలు, ఆధ్యాత్మిక ఆశీర్వదాలు ఉంటాయి'. 'ప్రతి పరీక్ష' విశ్వాసిని మరొక మెట్టుకు తీసుకెళ్తాయి(ఆయన ఏమై ఉన్నాడో అనుభవపూర్వకంగా కనపర్చుకుంటాడు). లోతుల్లోకి వెళ్ళేకొలది పరీక్ష తీవ్రత పెరుగుతుంది.లోతైన, బలమైన పాఠానికి సిద్ధమౌతున్నామని దానర్థం.మరొక ప్రామాణికం(standard) లోకి దేవుడు మనల్ని తీసుకెళ్తాడు. శ్రమ అనే పరీక్షలు విశ్వాసి దేవుణ్ని ఆనుకోవడానికి చక్కటి అవకాశాలు. సముద్రపు అలలు, గాలి తుఫాను వైపు చూస్తే ఖచ్చితంగా భయమే కలుగుతుంది గానీ, ఇప్పటివరకు మనల్ని నడిపిన, నమ్మకస్తుడునూ, నిత్యుడైన పరలోక రాజు యొక్క బలం వైపు చూస్తే, 'నిరీక్షణ' కలుగుతుంది. ఆయన ఒక్క మాటతో వాతావరణం తిరిగి నిమ్మళంగా మారిపోయింది. సమస్తంపై సర్వాధికారం కలిగిన దేవుణ్ని మనం దేవునిగా కలిగి ఉన్నాం!సమస్తం ఆయన ఆధీనంలోనే ఉంది. భయపడొద్దు!విశ్వాసం మాత్రం ఉంచుదాం!మన రక్షకుడైన దేవుని చేతిలో మనం భద్రంగా ఉన్నాం!మన హృదయాల్లో రేగే అలజడులను దేవుడు శీఘ్రంగా నిమ్మళ్ళపర్చును గాక!

అట్టి కృప ధన్యత దేవుడు మనకు అనుగ్రహించును గాక.

CHRIST TEMPLE-PRODDATUR
  Pastor.Nakkolla.Daniel Balu.