ఇలాంటి ప్రేమ ఎక్కడా దొరకదు

🕎 CHRIST TEMPLE-PRODDATUR 🕎
Welcome to Christ Temple. Our Sunday service at 10:00 am to 1:00 pm.in Proddatur. For more Details  : +91 8142229281.

ఇలాంటి ప్రేమ ఎక్కడా దొరకదు

‘ఆ తర్వాత’ యేసుప్రభువు తిబెరియ సముద్రతీరంలో శిష్యులకు ‘మళ్లీ’ తనను ప్రత్యక్షపర్చుకున్నాడంటుంది బైబిలులోని యోహాను సువార్త (21:1). ఈ వాక్యంలోని ‘ఆ తర్వాత’, ‘మళ్లీ’ అనే మాటలు చరిత్ర గతినే మార్చిన ఒక మహోన్నత ఘటనకు సాదృశ్యాలు. రోమా ప్రభుత్వం, యూదులు కలిసి యేసును సిలువ వేయగా ఆయన చనిపోయిన ‘తర్వాత’, ప్రాణభయంతో శిష్యులంతా ఆయన్ను వదిలి పారిపోయి తమ భవిష్యత్తుంతా అంధకారమైందన్న నిరాశావాదంలో కూరుకుపోయిన ‘తర్వాత’, యేసు పునరుత్థానుడయ్యాడని తెలిసినా, ఆయనకు ద్రోహం చేసి పార్టీ ఫిరాయించి పారిపోయిన తమను మాత్రం ఎట్టి పరిస్థితుల్లోనూ ఆయన ఇక దగ్గరకి రానివ్వరని శిష్యులు నిర్ధారణకు వచ్చిన ‘తర్వాత’, యేసు వారిని వెంబడిస్తూ యెరూషలేము నుండి తెబిరియ సముద్ర తీరానికి రావడం, వారికి ‘మళ్లీ’ ప్రత్యక్షమై వారితో సహవసించడం తిరుగులేని, ఎన్నటికీ తరగని దేవుని అద్భుత ప్రేమకు తార్కాణం!

మూడేళ్ల క్రితం ఇదే సముద్రతీరంలో నేను మిమ్మల్ని మనుషులను పట్టే జాలరులను చేస్తానన్న ప్రభువు వాగ్దానంతో (లూకా 5:10) వారి విశ్వాస యాత్ర ఆరంభమైంది. ఇపుడు భవిష్యత్తంతా అంధకారమయంగా కనిపించగా, యేసు లేకుండా మళ్లీ అదే ప్రదేశానికొచ్చారు. రాత్రంతా ప్రయాసపడ్డా ఒక్క చేపను కూడా పట్టలేకపోయిన ‘వైఫల్యం’ వారిని మరింత కృంగదీసిన నేపథ్యంలో, ‘సూర్యోదయవేళ’ (యోహాను 21:4) యేసు వారికి తీరంలో కనిపించి పలకరించాడు. పిరికితనం, విద్రోహం, ఇప్పుడు వైఫల్యంతో కూడిన వారి నిరాశావాదమంతా ప్రభువు సాక్షాత్కారంతో పటాపంచలయింది.

నిజమే, లోకాన్నంతా వెలుగుమయం చేసే సూర్యోదయం, ఇంటి కిటికీలు తలుపులు తెరిస్తేనే, మన గుండె ద్వారాలు తెరిస్తేనే మన సొంతమవుతుంది. యేసు సహచర్యంతో వారానాడు ఆ తర్వాత బోలెడు చేపలు పట్టారు. ప్రభువు వారితో అదే తీరంలో ఆనాడే పునరుత్థాన వినూత్న యుగానికి చెందిన ఒక కొత్త నిబంధన వారితో చేసుకోగా, నాటి నుండి అసమాన సువార్తవీరులయ్యారు, హతసాక్షులై మానవ చరిత్రను తిరగరాశారు. లోకాన్ని మనమెంత ప్రేమించినా అది మనకిచ్చేది అంధకారమే, నిరాశావాదమే, వైఫల్యమే!! కాని ప్రభువు మళ్లీ ప్రవేశించడంతో విశ్వాస జీవితంలో సూర్యోదయమవుతుంది, బతుకు బాటంతా వెలుగుమయమవుతుంది.

వెంటాడి మరీ చీకటిని పటాపంచలు చేసే శక్తి ఎన్నటికీ తరగని, మారని, వాడని దేవుని అద్భుతమైన ప్రేమది. అందుకే పాపులను, పడిపోయిన వారిని ప్రేమించి గుండెలకు నిండుగా హత్తుకొని వారి జీవితాలను దివ్యంగా పునరుద్ధరించే ప్రభువని యేసుకు పేరు. పిరికితనం, ద్రోహస్వభావం, పలాయనవాదం, నిరాశావాదం మనలోనే తిష్టవేసుకున్న మన అంతఃశత్రువులు. వైఫల్యం, అంధకారం అవి మనకిచ్చే బహుమానాలు. వాటి మీద విజయమిచ్చేవాడు, అలా మనల్ని అజేయులను చేసేవాడు మాత్రం ప్రభువే!

అట్టి కృప ధన్యత దేవుడు మనకు అనుగ్రహించును గాక. ఆమెన్.
▪ CHRIST TEMPLE-PRODDATUR ▪

బుద్ధిలేని కన్యకలు

🕎 CHRIST TEMPLE-PRODDATUR 🕎

Welcome to Christ Temple. Our Sunday service at 10:00 am to 1:00 pm.in Proddatur. For more Details  : +91 8142229281.

బుద్ధిలేని కన్యకలు

అయ్యా, అయ్యా, మాకు తలుపు తీయుమని అడుగగా
మత్తయి 25:11

ఆ కాలంలో యూదుల వివాహాలు ఎట్లా జరిగేవి అంటే? వివాహ వ్యవధిని 15 రోజులుగా నిర్ణయించే వారు. ఉదా: జనవరి 1 నుండి 15వ తేదీ లోపు వివాహం జరగాలని. 
అందుచే ఈ పదిహేను రోజులు పెండ్లి కుమార్తెతో పాటు కొంత మంది కన్యకలు విడిది గృహంలో ఎదురు చూస్తూ వుండాలి. పెండ్లి కుమారుడే స్వయంగా అక్కడకి వచ్చి, పెండ్లి కుమార్తెను వివాహం జరిగే స్థలానికి తీసుకొని వెళ్తాడు. (నేటి దినాలలో కూడా పెండ్లి కుమార్తె వస్తుంటే? పెండ్లి కుమారుడు ఎదురు వెళ్లి, తీసుకొని వస్తాడు.)

అతడు ఎప్పుడు వస్తాడో ఎవ్వరికీ తెలియదు. పగలు కావచ్చు, అర్ధరాత్రి కావొచ్చు, తెల్లవారు జాము కావొచ్చు. ఆ 15 రోజులలో ఎప్పుడైనా రావొచ్చు. వచ్చే ముందు ఒక వ్యక్తి పెద్దగా పెండ్లి కుమారుడు వస్తున్నాడని కేకలు వేస్తూ ముందుగా వస్తాడు. ఆ కేకలు విని ఈ కన్యకలు పెండ్లి కుమార్తెను సిద్ధ పరచి, వారునూ సిద్ధ పడాలి. కొందరు కన్యకలు దివిటీలు పట్టుకుంటారు, కొందరు పాటలు పాడుతూ నాట్యం చేస్తారు, మరి కొందరు కంజెరలు వాయిస్తారు.

ఇక్కడ దివిటీలు పట్టుకొనే పదిమంది కన్యకల కోసం వ్రాయబడింది.

• పదిమందీ కన్యకలే.
• పదిమందీ వివాహానికి పిలువ బడ్డారు. 
• పదిమందీ సిద్ధెలను కలిగి యున్నారు. 
• పదిమందీ విడిది గృహానికి చేరుకున్నారు. 
• పది మందీ నిద్రపోయారు. 
(పెండ్లి కుమారుని రాక ఆలస్యం కావడం వలన)
• పదిమందీ పెండ్లి కుమారుడు వస్తున్నాడు అనే కేక విన్నారు. 
• పదిమందీ నిద్ర లేచారు. 
• పదిమందీ సిద్ధెలు వెలిగించారు. 
• పదిమంది సిద్ధెలూ వెలిగాయి. 

కాని, ఐదుగురు సిద్ధెలు ఆరిపోయాయి.
కారణం?

ఆ సిద్దెలలో నూనె లేదు

పెండ్లి కుమారుడు రానే వచ్చాడు. సిద్ధపడిన వారిని తీసుకొని వెళ్ళిపోయాడు. విందుశాల గడియ వేయబడింది.

తర్వాత వచ్చి, అయ్యా! అయ్యా! అంటూ తలుపు తడుతూవున్నారు. లోపలి నుండి సమాధానం " మీరెవరో నాకు తెలియదు". ఎంత రోధించినా అది ఎన్నటికీ తెరువబడదు.

అవును! మన జీవితాలూ అంతే కదా? ఆరాధనకు వెళ్తున్నాము, పాటలు పాడుతున్నాము, వాక్యం వింటున్నాము, అంతే బానేవుంది. క్రీస్తు బిడ్డలవలెనే చలామణి అయిపోతున్నాము. కాని నూనె అనెడి "పరిశుద్దాత్మ" లోపించింది. రక్షించబడి, బాప్తీస్మం పొందుకున్న మనము ఆ ఆత్మను కలిగి యున్నాము. కాని మన శరీర కార్యములు ఆత్మను పనిచెయ్యనివ్వ కుండా అడ్డుగా వచ్చేస్తున్నాయి.

తద్వారా వెలిగి ప్రజ్వలించ వలసిన జీవితాలు ఆరిపోతున్నాయి. ఒకవేళ ఈదినమే, పెండ్లి కుమారుడైన యేసు ప్రభువు వారు పెండ్లి కుమార్తె (సంఘము) అయిన నిన్ను తీసుకొని వెళ్ళడానికి వస్తే? ఎత్త బడతావా? ఆ గొర్రె పిల్ల మహోత్సవపు విందులో పాల్గొంటాను అనే నిరీక్షణ నీకుందా?

ఒకవేళ విడువబడితే ? 

రొమ్ము కొట్టుకొని రోదించినా? అది అరణ్య రోధనే తప్ప, ఫలితం శూన్యం.ఆయన చెప్పే మాట అదే. "నీవెవరో నాకు తెలియదు". నీ ప్రార్ధన నేను వినను.

శపింప బడినవారలారా, నన్ను విడిచి అపవాదికిని వాని దూతల కును సిద్ధపరచబడిన నిత్యాగ్నిలోనికి పోవుడి.
మత్తయి 25: 41

అంటాడేమో? వద్దు అది భయంకరం. దీపముండగానే ఇల్లు చక్క బెట్టుకుందాం!
ప్రభువు రాకడకై సిద్ధ పడదాం! 
ఆ నిత్య రాజ్యంలో ప్రవేశిద్దాం!

అట్టి కృప, ధన్యత 
దేవుడు మనకు అనుగ్రహించునుగాక!
ఆమెన్! ఆమెన్! ఆమెన్!
▪ CHRIST TEMPLE-PRODDATUR ▪

గాడిదవలే గడ్డి మేయాల్సి వచ్చింది

🕎 CHRIST TEMPLE-PRODDATUR 🕎

Welcome to Christ Temple. Our Sunday service at 10:00 am to 1:00 pm.in Proddatur. For more Details  : +91 8142229281.

గాడిదవలే గడ్డి మేయాల్సి వచ్చింది

గర్విష్ఠులను నీవు గద్దించుచున్నావు. నీ ఆజ్ఞలను విడిచి తిరుగువారు శాపగ్రస్తులు.
కీర్తనలు 119:20

👉దేవుని వాక్యాన్ని అనుసరించేవారికి గర్వము వుండదు.

ఎందుకంటే?

👉 వారి అతిశయం ఏదైనా వుందంటే?
అది దేవునియందే.

👉నీవు ఈలోక యోగ్యతలను బట్టి అతిశయిస్తున్నావంటే? గర్విస్తున్నావంటే?
వాక్యానుసారమైన జీవితం నీలో లేనట్లే.

🔺గర్విష్ఠులను ఆయన గద్దిస్తాడు.

👉నీ హృదయం గర్వముతో నిండివుంటే?

🔺 పతనం అంచుల్లో వున్నావని జ్ఞాపకము చేసుకో.

గర్విష్ఠులు తొట్రిల్లి కూలిపోతారు

నాశనమునకు ముందు గర్వము నడచును.
       సామెతలు 16:18

గర్విష్ఠుడు తొట్రిల్లి కూలును అతని లేవనెత్తువాడెవడును లేకపోవును నేనతని పురములలో అగ్ని రాజబెట్టెదను అది అతని చుట్టుపట్టులన్నిటిని కాల్చివేయును.
       యిర్మియా 50:32

♻ నెబుకద్నెజరు హృదయము గర్వముతో నిండిపోయినప్పుడు ఏడు సంవత్సరాలు గాడిదవలే గడ్డి మేయాల్సి వచ్చింది.

నెబుకద్నెజరను నేను పరలోకపు రాజుయొక్క కార్యములన్నియు సత్య ములును, ఆయన మార్గములు న్యాయములునై యున్న వనియు, గర్వముతో నటించువారిని ఆయన అణపశక్తు డనియు, ఆయనను స్తుతించుచు కొనియాడుచు ఘన పరచుచు నున్నాను.
        దానియేలు 4:37

దేవుని ఆజ్ఞలు విడచి తిరిగేవారు ఆయన సన్నిధిలో నిలవలేరు

న్యాయవిమర్శలో దుష్టులును నీతిమంతుల సభలో పాపులును నిలువరు.
            కీర్తనలు 1:5

డాంబికులు నీ సన్నిధిని నిలువలేరు పాపము చేయువారందరు నీకసహ్యులు
            కీర్తనలు 5:5

గర్విష్ఠులు, డాంబికులు ( గొప్పలు చెప్పుకొనేవారు) దేవుని సన్నిధిలో నిలవలేరు. వారు పొందే ప్రతి ఫలం శాపము.

శపింప బడినవారలారా, నన్ను విడిచి అపవాదికిని వాని దూతల కును సిద్ధపరచబడిన నిత్యాగ్నిలోనికి పోవుడి.
        మత్తయి 25: 41

దావీదు గారు సమస్యలు వచ్చినప్పుడు , ధనము విస్తారముగా వున్నప్పుడు ఒకేమాధిరి వున్నాడు. గర్వం లేకుండా జీవించి దేవుణ్ణి మహిమపరిచాడు.

నీ సేవకుడనైన నేను బ్రదుకునట్లు నాయెడల నీ దయారసము చూపుము నీ వాక్యమునుబట్టి నేను నడుచుకొనుచుందును.
       కీర్తనలు 119:17

👉దావీదు కష్టం, నిందలు, శ్రమలు, వేదనలో ఉన్నట్లు ఈ మాటలను బట్టి మనకు అర్ధమవుతుంది.
*అయినప్పటికీ, వచ్చిన కష్టాలను బట్టి కృంగిపోయే స్వభావం ఆయనది కాదు.

👉 శ్రమ వచ్చినప్పుడు ఏమి చెయ్యాలో ఆయనకు బాగా తెలుసు.

శ్రమ వచ్చినప్పుడు కృంగిపోకుండా దేవుని మాటలను తలపోసుకొంటూ ఆయనపైనే ఆధారపడడం దావీదు యొక్క లక్షణం. అది మన జీవితాలకు గొప్ప ఆధ్యాత్మిక పాఠం.

👉మనమైతే?

🔺శ్రమ కలిగినప్పుడు ఆయన చెంతకు చేరతాము.

🔺 ఆయన దయ చూపించి మనలను ఆ శ్రమ నుండి విడిపించినప్పుడు,

🔺 ఇక ఆయననే మరచిపోతాము.

రాజైన దావీదు అయితే, శ్రమ నుండి నేను విడిపింప బడినప్పుడు, ఆయన వాక్యమును బట్టి నడచుకొంటాను అంటున్నాడు.

👉ఆయన వాక్యమును అనుసరించగలిగితే?

🔺నిందల నుండి మనలను తప్పిస్తాడు.

నేను నీ శాసనముల ననుసరించుచున్నాను. నామీదికి రాకుండ నిందను తిరస్కారమును తొలగింపుము.
        కీర్తనలు 119:22

👉ఆధికారులు తనని ఎట్లా నాశనం చెయ్యాలా అని మీటింగులు పెట్టి మాట్లాడుకుంటుంటే?

🔺ఈయన మాత్రం దేవుని వాక్యాన్ని ధ్యానం చేస్తున్నాడట.

అధికారులు నాకు విరోధముగా సభతీర్చి మాటలాడు కొందురు నీ సేవకుడు నీ కట్టడలను ధ్యానించుచుండును.
         కీర్తనలు 119:23

👉దేవుని వాక్యాన్ని ధ్యానిస్తూ, అనుసరించగలిగితే?

నీ ప్రతీ ప్రశ్నకు ఆయనే సమాధానం.

నీ ప్రతీ సమస్యకూ ఆయనే పరిష్కారం.

👉అందుకే దావీదు ఒక నిశ్చయతలోనికి వస్తున్నాడు.

శ్రమ కలిగినప్పుడు దేవుని వాక్యాన్ని ధ్యానించాలి.

అట్లా చెయ్యడం ద్వారా ఆ దుఃఖం ఆనందముగా మలచబడుతుంది. అది ఆయన వ్యక్తిగత అనుభవం.

ఒక్క విషయం!!

ఆయన మాటలే నిన్ను జీవింపజేసేవి. ఆయన మాటలే నిన్ను నిత్య జీవానికి నడిపించేవి.

అట్టి గ్రహింపులోనికి మనము వచ్చి, ఆయన మాటలయందు ఆనందించే వారముగా మన జీవితాలను సిద్ధ పరచుకొందాం!

ఆయన ఆజ్ఞలను అనుసరిద్దాం!
ఆ నిత్య రాజ్యంలో ప్రవేశిద్ధాం.ఆమెన్.
▪ CHRIST TEMPLE-PRODDATUR ▪

ఐ యాం వెరీ సారీ

🕎 CHRIST TEMPLE-PRODDATUR 🕎
Welcome to Christ Temple. Our Sunday service at 10:00 am to 1:00 pm.in Proddatur. For more Details  : +91 8142229281.

✳ ఐ యాం వెరీ సారీ ✳

 క్షమాపణ హింస లేకుండానే వివాదాలను పరిష్కరిస్తాయి,
దేశాల మధ్య ఏర్పడిన చీలికలను కూడా సరిచేస్తాయి.

👉పాడైన సంబంధాలను మెరుగుపరచుకోవడానికి నిజాయితీగా క్షమించమని అడగడం ఒక ప్రభావవంతమైన మార్గమని బైబిలు ధృవీకరిస్తోంది.

👉 తప్పిపోయిన కుమారుని గురించి యేసు చెప్పిన ఉపమానంలో, కుమారుడు ఇంటికి తిరిగి వచ్చి హృదయపూర్వకంగా క్షమించమని అడిగినప్పుడు, తండ్రి అతడిని తిరిగి ఇంట్లోకి చేర్చుకోవడానికి ఎంతో ఆత్రుత చూపించాడు. (లూకా 15:17-24)

👉అవును,

ఒక వ్యక్తి అహంకార భావాలను ప్రక్కనపెట్టి, క్షమించమని అడగడానికి గర్వం ఎన్నడూ అడ్డురాకూడదు.

🔹 క్షమాపణ చెప్పడం నిజంగా వినయస్థులైన వ్యక్తులకు అంత కష్టమేమీ కాదన్నది వాస్తవం.

  క్షమాపణకున్న శక్తి

👉ప్రాచీన ఇశ్రాయేలుకు చె౦దిన జ్ఞానవ౦తురాలైన అబీగయీలు తన భర్త చేసిన తప్పుకు క్షమాపణ చెప్పుకున్నప్పటికీ,

క్షమాపణ యొక్క శక్తికి ఒక మంచి ఉదాహరణగా ఉ౦డేలా ఆమె ప్రవర్తి౦చి౦ది.

🔺దావీదు తాను అరణ్య౦లో నివసిస్తున్నప్పుడు తన మనుష్యులతో కలిసి, అబీగయీలు భర్త అయిన నాబాలుకు చె౦దిన మ౦దలను కాపాడాడు, ఈయన ఆ తర్వాత ఇశ్రాయేలుకు రాజయ్యాడు. అయితే, దావీదుతో ఉన్న యౌవనస్థులు రొట్టె నీళ్ళ కోస౦ అడిగినప్పుడు, నాబాలు వారితో అవమానకర౦గా మాట్లాడి వారిని ప౦పి౦చివేశాడు. దానితో ఉగ్రుడైన దావీదు తనతోపాటు దాదాపు 400 మ౦ది పురుషులను వె౦టబెట్టుకుని నాబాలు మీదికి, ఆయన కుటు౦బ౦ మీదికి యుద్ధానికి బయలుదేరాడు. ఈ విషయ౦ తెలుసుకున్న అబీగయీలు దావీదును కలవడానికి బయల్దేరి౦ది.

ఆమె ఆయనను కలుసుకుని ఆయనకు సాష్టా౦గ నమస్కారము చేసి౦ది. తర్వాత ఆమె ఇలా అన్నది.

“నా యేలినవాడా, యీ దోషము నాదని యె౦చుము; నీ దాసురాలనైన నన్ను మాటలాడ నిమ్ము, నీ దాసురాలనైన నేను చెప్పుమాటలను ఆలకి౦చుము.”
👉 తర్వాత అబీగయీలు దావీదుకు పరిస్థితిని వివరి౦చి, ఆయనకు ఆహారాన్ని పానీయాలను కానుకగా ఇచ్చింది. దానికి ఆయనిలా అన్నాడు:
*“నీ మాటలు నేను ఆలకించి నీ మనవి నంగీకరించితిని, సమాధానముగా నీ యింటికి పొ[మ్ము].”
—⁠1 సమూయేలు 25:2-35.

👉అబీగయీలుకున్న వినయ స్వభావం,
👉తన భర్త దురుసు ప్రవర్తనకు ఆమె క్షమాపణ చెప్పడం ఆమె ఇంటి వారిని రక్షించాయి.
👉 పగతీర్చుకొనకు౦డ ఆపిన౦దుకు దావీదు ఆమెకు కృతజ్ఞతలు కూడా తెలియజేశాడు.

దావీదుతోనూ ఆయన మనుష్యులతోనూ దురుసుగా ప్రవర్తి౦చి౦ది అబీగయీలు కాకపోయినా, ఆమె తన కుటు౦బ౦ తరపున ని౦దను అ౦గీకరి౦చి దావీదుతో సమాధానపడి౦ది.

కాబట్టి క్షమాపణ చెప్పడం సమాధానపడడానికి తోడ్పడుతుంది.

🔹అవును, మన పొరపాట్లను అంగీకరించి చేసిన నష్టానికి క్షమాపణ చెప్పుకోవడం నిర్మాణాత్మకమైన చర్చలకు అవకాశాలను కలిగిస్తుంది.

👉 ‘కానీ నేను ఏ తప్పూ చేయలేదు’

👉మనం అన్నదాన్ని బట్టి లేదా చేసినదాన్ని బట్టి ఎవరికైనా బాధ కలిగిందని మనకు తెలిసినప్పుడు ఆ వ్యక్తి నిర్హేతుకంగా ప్రవర్తిస్తున్నాడనో మరీ అతిగా ప్రతిస్పందిస్తున్నాడనో మనకు అనిపించవచ్చు.

👉 ఈ సూత్రాన్ని మనస్సులో ఉంచుకోవడం, మనం తమ పట్ల తప్పు చేశామని భావించే వారికి క్షమాపణ చెప్పడం సులభమయ్యేలా చేస్తుంది.

👉మనం యథార్థంగా క్షమాపణ చెబుతున్నట్లయితే, మనం మన తప్పును ఒప్పుకుని, క్షమించమని అడిగి, సాధ్యమైనంత మేరకు జరిగిన నష్టాన్ని పూడ్చడానికి ప్రయత్నిస్తాము. దానికి ప్రతిస్పందనగా, గాయపర్చబడిన వ్యక్తి కూడా పశ్చాత్తాపపడుతున్న తప్పిదస్థుడ్ని వెంటనే క్షమించాలి.
(మత్తయి 18:21, 22; మార్కు 11:25;ఎఫెసీయులు 4:32; కొలొస్సయులు 3:13)

👉 ఇరువర్గాల వారూ అపరిపూర్ణులే గనుక సమాధానపడడం ఎల్లప్పుడూ అంత సరళంగా జరగకపోవచ్చు.
👉అయినప్పటికీ సమాధానపడడంలో క్షమాపణ చెప్పడం బలమైన ప్రభావంగా పనిచేస్తుంది.

మన దేవుని ప్రేమయు, రక్షకుడైన యేసుక్రీస్తు కృపయు, పరిశుద్ధాత్మ సహవాసమును మీకందరికిని తోడైయుండును గాక.

ఆమేన్ ! ఆమేన్ !! ఆమేన్ !!!

▪ CHRIST TEMPLE-PRODDATUR ▪

దొంగ భక్తి

🕎 CHRIST TEMPLE-PRODDATUR 🕎
Welcome to Christ Temple. Our Sunday service at 10:00 am to 1:00 pm.in Proddatur. For more Details  : +91 8142229281.

  దొంగ భక్తి

పాస్టర్‌గారు చర్చిలో ప్రసంగం చేస్తున్నారు. చర్చి బయట గుమ్మానికి ఒకవైపు యేసుక్రీస్తు బొమ్మలు, మరోవైపు సాతాను బొమ్మలు పెట్టి ఆ రెండింటిలో ఒకటి పట్టుకొమ్మంటే మీరు దేన్ని తీసుకుంటారు? అని ఆయన ప్రశ్నించారు. యేసుప్రభువు బొమ్మ.. కావాలన్నారంతా! ‘ఒకవేళ యేసుక్రీస్తుది చెక్కబొమ్మ, సాతానుది బంగారం బొమ్మ అయితే దేన్ని తీసుకుంటారు?’ అని అడిగారాయన. చర్చిలో అంతా నిశ్శబ్దం. జవాబు అర్థమైంది.

దేవుని ప్రేమను, గొప్పదనాన్ని విశ్వాసి జీవనశైలి ద్వారానే లోకం స్పష్టంగా తెలుసుకుంటుంది. అందుకే క్రియలు లేని విశ్వాసం మృతప్రాయం  అంటుంది బైబిలు (యాకోబు2:17).

 ధనప్రలోభంతో విశ్వాస భ్రష్టులైన ఆదిమ కాలపు భార్యాభర్తలు అననీయ, సప్పీర. యేసు ఉంటే చాలనుకున్న నాటి చాలామంది విశ్వాసులు తమ ఆస్తులమ్మి ఆ డబ్బంతా తెచ్చి అపొస్తలుల పాదాల వద్ద పెడుతున్న రోజులవి. అననీయ, సప్పీర కూడా తమ పొలం అమ్మారు. కాని దాంట్లో కొంత దాచుకొని మిగిలిన మొత్తం తెచ్చిచ్చారు. పొలాన్ని మీరింతటే అమ్మారా అని పేతురు ప్రశ్నిస్తే అంతకే అమ్మామంటూ ఇద్దరూ కూడబలుక్కొని మరీ అబద్ధమాడారు. అంతే! దేవుని ఉగ్రతకు లోనయ్యారు. దేవుడంటే భక్తి మాత్రమే కాదు. దేవుని భయమూ ఉండాలి. దేవుని కోసం వారు పొలం అమ్మి తమ భక్తిని చాటుకున్నారు.

కాని అందులో కొంత దొంగిలించి తమది దేవుని భయం కరువైన దొంగభక్తి అని రుజువు చేసుకున్నారు. అర్పణలు, ఆరాధనలు, పాటలు, ప్రార్థనలు, ప్రసంగాలు, సాక్ష్యాలు ఇవన్నీ భక్తితో ముడిపడిన అంశాలు. అయితే జీవితంలో యథార్థత, సచ్ఛీలత దేవుని భయంతో ముడిపడిన అంశాలు. కుటుంబావసరాల కోసం పొలం అమ్మి ఉంటే అందులో దేవునికి మేమేమీ ఇవ్వలేమని తెలిసి ఉంటే అసలు సమస్యే లేదు. కాని ఆదిమ సంఘంలో దేవునికి ధారాళంగా ఇస్తున్న చాలామంది కంటే ఆత్మీయంగా తాము తక్కువేమీ కాదని గొప్పలు చెప్పుకునేందుకు పొలం అమ్మగా వచ్చిన డబ్బంతా ఇస్తున్నామని అబద్ధం చెప్పారు.

కాని ‘ఆత్మీయత’ను  నటించబోయి, తమ జీవితాన్ని నాశనం చేసుకున్నారు వారు. దేవునికి ఎంతో హేయమైననది వేషధారణ! కరడుకట్టిన పాపుల పట్ల కూడా యేసుక్రీస్తు కరుణ చూపించాడు. కాని పరిసయ్యల వంటి వేషధారులను సున్నం కొట్టిన సమాధుల్లారా! అంటూ ఎంతో పరుషమైన పదజాలంతో సంబోధించాడు. అననీయ, సప్పీరా లేని ఆత్మీయతను చూపించుకునే గొప్పలకు పోయి చరిత్రహీనులయ్యారు.

 సమాజంలోని అన్ని రంగాల్లోనూ పదార్థవాదం (మెటీరియలిజం) ప్రబలి డబ్బే కేంద్రంగా సాగుతున్న ‘అధర్మయుగం’లో మనం జీవిస్తున్నాం. దేవుడు మనను చూడడులే అనుకున్నారు వారిద్దరూ. దేవుడు చూడటమే కాదు అక్కడికక్కడ తక్షణ తీర్పునిచ్చి తన ఉగ్రతను బయలుపర్చాడు! ధనంతో నిమిత్తం లేని నిష్కల్మషమైన దేవుని ప్రేమ బీద, గొప్ప తేడా లేకుండా అందరినీ తన వద్దకు ఆకర్షిస్తుంది. ఇది తిరుగులేని వాస్తవం. దేవుని పట్ల యథార్థత కలిగిన విశ్వాసులు, కుటుంబాలు, చర్చిలు ధనాపేక్షకు, ప్రలోభాలకు అతీతంగా ఉంటారు.
కావున ప్రియమైన మిత్రులందరికీ నా విన్నపము ఏమనగా..దేవుని వద్ద నటించి ఏదో సమాజంలో పేరు ప్రఖ్యాతలు కోసం అస్సలు ప్రయత్నం చేయకండి. సేవకుని మోసగించాలని చూసిన అననియ ,సప్పిర ఏమయ్యారు...?

అందుకే దేవుని యెదుట యదార్థంగా , భయభక్తులు కలిగి ఉండాలి.

అట్టి కృప ధన్యత దేవుడు మనకు అనుగ్రహించును గాక. ఆమెన్.

▪ CHRIST TEMPLE-PRODDATUR ▪

నిద్ర - రహస్యాలు

🕎 CHRIST TEMPLE-PRODDATUR 🕎
Welcome to Christ Temple. Our Sunday service at 10:00 am to 1:00 pm.in Proddatur. For more Details  : +91 8142229281.

  నిద్ర - రహస్యాలు

👉 ఎక్కువసేపు నిద్రపోవుట వల్ల..

1. లేమి వచ్చును.
సామెతలు 6:9-11

2. చింపి గుడ్డలు వేసుకొనెదవు.  సామెతలు 23:21

3. దరిద్రత పరిగెత్తి వచ్చును. సామెతలు 24:33

 👉 కావున స్నేహితుడా ఎక్కువ నిద్రపోకు. పెందలకడ లేచి ఆయనను ప్రార్ధించు. దేవునితో దిన ప్రారంభం చెయ్యి. దినముకు ఎన్నిసార్లు ప్రార్ధిస్తున్నావు..?

👉 నిద్ర వల్ల దరిద్రం వచ్చును.

 👉 ప్రార్ధన వల్ల ఐశ్వర్యం వచ్చును. కోతకాలము నందు నిద్రించువాడు సిగ్గుపరుచు కుమారుడు..సామెతలు 10:5

బైబిల్ ల్ కొందరి నిద్రలు:-

🔶 1. ఆదాము నిద్ర...... ఆది 2:21
🔶 2. ఫరో నిద్ర. ఆది 41:5
🔶 3. అబ్రాము నిద్ర. ఆది 15:12
🔶 4. యాకోబు నిద్ర.  ఆది 28:16
🔶 5. సీసెరా నిద్ర. న్యాయాది 4:21
🔶 6. సంసోను నిద్ర. న్యాయాది 16:14
🔶 7. యోనా నిద్ర. యోనా 1:5
🔶 8. యోసేపు నిద్ర. మత్తయి 1:24
🔶 9. ఐతుకు నిద్ర.  అపో. 20:9
🔶 10. పేతురు నిద్ర. అపో. 12:6
🔶 11. యేసు నిద్ర. మత్తయి 8:24
🔶 12. శిష్యుల నిద్ర.  మత్తయి 26:45
🔶 13. పెండ్లి కుమార్తెల నిద్ర. మత్తయి 25:5
🔶 14. ఎలీయా నిద్ర. 1రాజులు 19:5

👉 ఆదాము తన నిద్రలో తనకు తోడును తెచ్చుకున్నాడు.

👉 అబ్రాము, ఫరో, యాకోబు నిద్రలో తమ జీవితాన్ని ముందే తెలుసుకున్నారు.

👉 సీసెరా నిద్రలోనే మోకులతో తలపై కొట్టబడి చనిపోయాడు.

👉 సంసోను నిద్రలో తన శక్తిని కోల్పోయాడు.

ప్రియులారా సంసోనులా చెడు సాంగత్యానికి అలవాటు పడితే సంసోనులా ఏదో ఒక విధముగా పట్టుపడతావ్ అని మరచిపోకు.

🔬 ఇప్పుడు నిద్ర గురించి డాక్టర్స్ ఏమంటున్నారో చూద్దాం.(సేకరణ)

▪కడుపునిండా తిండి, కంటినిండా నిద్ర...

ఈ రెండింటిలో దేనిలోనైనా తేడా వస్తే మనిషి అనారోగ్యం పాలవుతాడు. పరిస్థితి విషమిస్తే మరణానికి దగ్గరవుతాడు. తిండి తినకుండా 20 నుంచి 40 రోజుల వరకు ఉండొచ్చు కానీ నిద్ర పోకుండా మాత్రం ఎక్కువ రోజులు ఉండటం అసాధ్యం. ఒక్కరోజు సరిగా నిద్రలేకుంటే పని చేస్తున్నప్పుడు మధ్యలోనే కునుకుపాట్లు, తలనొప్పి ముంచుకొస్తుంటాయి. యూనివర్సిటీ ఆఫ్ కాలిఫోర్నియా శాస్త్రవేత్తల సర్వే ప్రకారం ఓ మనిషి నిద్రపోకుండా 264 గంటలు.. అంటే 11 రోజుల పాటు ఉండగలడట. అంతకుమించితే చావును చూడాల్సి వస్తుందని సర్వే చేసిన వారు తేల్చిచెప్పారు.

           అయితే నేటి యువత ఫేస్‌బుక్ డేటింగ్‌లు, వాట్సప్ చాటింగ్‌లతో నిద్రను దూరం చేసుకుంటోంది. తద్వారా రోగాల బారిన పడుతోంది. అధిక రక్తపోటు, పక్షవాతం, గుండె జబ్బులు, మధుమేహం, వంటి సమస్యలకు నిద్రలేమి కారణమని డాక్టర్లు చెప్పినా, స్థూలకాయానికి దారితీస్తుందని సర్వేలు ఘోషించినా పెడచెవిన పెడుతోంది. అయితే నిద్రను దూరం చేసుకోవడం వల్ల కలిగే రోగాలు, నష్టాల గురించి చాలామందికి తెలుసు. కానీ నిద్రే రోగంగా మారి పీడిస్తుంటే... నిద్ర వద్దు బాబోయ్ అని ఎంత పట్టుదలగా ఉన్నా తెలియకుండానే నిద్రలోకి జారుకుంటే... ఒకటి కాదు రెండు కాదు ఏకంగా రోజుల తరబడి నిద్రలోనే ఉండిపోతే.... ఏంటీ విచిత్రం అని అనుకుంటున్నారా? అస్సలు నమ్మలేకపోతున్నారా? ఎవరు నమ్మినా నమ్మకపోయినా నిద్ర ఓ సమస్యగా మారి ఎంతో మందిని వేధిస్తోంది. ఆ వింత విచిత్ర నిద్ర రోగాలేవో ఒకసారి చూద్దాం.

కుంభకర్ణుడి గురించి భారతీయులకు వేరుగా చెప్పనక్కర్లేదు. ఆరు నెలలపాటు ఏకధాటిగా నిద్రపోయేలా రావణుడి సోదరుడయిన కుంభకర్ణుడికి బ్రహ్మ వరమిస్తాడు. మరి దేవుడి వరమో, ఎవరు ఇచ్చిన శాపమో కానీ ఓ యువతి కూడా ఈ కుంభకర్ణుడికి పోటీనిస్తోంది. కుంభకర్ణుడిలా ఆరు నెలలు కాదు గానీ ఏకధాటిగా పన్నెండు రోజుల పాటు నిద్రపోతోంది. బ్రిటన్‌కి చెందిన లూసియా బాల్ అనే 22 ఏళ్ల యువతి పడుకుంటే చాలు 8 నుంచి 12 రోజుల పాటు నిద్రపోతోంది. స్లీపింగ్ బ్యూటీ అని పేరు తెచ్చుకున్న ఈ యువతి రోజులో దాదాపు 22 గంటలపైనే నిద్రపోతుంది. మిగిలిన రెండు గంటలు కూడా మితంగా.. నిద్రలో ఉంటుందట. ఆ సమయంలో అతి కష్టం మీద ఆమె తల్లిదండ్రులు ఆహారం, నీళ్లు, కాలకృత్యాలు వంటి అవసరాలను తీరుస్తారు. వెన్వెంటనే మళ్లీ నిద్రలోకి జారుకుంటుంది. ఈ నిద్ర రోగం వల్ల అమ్మాయి చదువు కోల్పోతోందనీ, ప్రయాణాలు చేయలేకపోతోందనీ తల్లిదండ్రులు వాపోతున్నారు. క్లీనె-లెవిన్ సిండ్రోమ్ (Kleine-Levin) వల్ల ఈ విధంగా రోజుల తరబడి ఆమె నిద్రపోతోందని వైద్యులు తెలిపారు. దీనికి కచ్చితమైన వైద్యం లేదని డాక్టర్లు కూడా తేల్చేశారు. ఇలాంటి నిద్ర రోగం ప్రపంచవ్యాప్తంగా దాదాపు 1000 మందికి పైగానే ఉందని సర్వేలు చెబుతున్నాయి.

నిద్రపోయినప్పుడు పిలిస్తే కొంతమంది ఇట్టే లేస్తారు. ఒక్కసారి ముట్టుకుంటే చాలు ఉలిక్కిపడి లేచి కూర్చుంటారు. కానీ అతి తక్కువ శాతం మంది మాత్రం ఎంత పిలిచినా ఉలకరు పలకరు. మెలకువ వచ్చినా లేవలేరు కూడా. దీనినే స్లీప్ పెరాలసిస్ అంటారు. పెరాలసిస్ వ్యాధిగ్రస్థులు మంచం మీద నుంచి లేవలేరు. స్లీప్ పెరాలసిస్ (Sleep Paralysis) లక్షణాలు ఉన్నా అంతే! నిద్రలో నుంచి మెలకువ వచ్చినా సరే.. లేచి కూర్చోలేకపోవడాన్నే స్లీప్ పెరాలసిస్ అంటారు. మితమైన నిద్రలో ఉండి, కాళ్లు, చేతులు పట్టేసినట్లు ఉండి శరీరం మొత్తం అచేతన స్థితిలోకి వెళ్లిపోతుంది. అయితే కొద్దిసేపటికి దానికదే మళ్లీ సాధారణ స్థితికి వచ్చేస్తుంది కూడా. ఇలాంటి నిద్ర రోగం వల్ల నష్టం ఏమీ లేకున్నా, అత్యవసర పరిస్థితుల్లో మాత్రం కొంచెం కష్టమేనని డాక్టర్లు చెబుతున్నారు. చైనాలోని కొన్ని ప్రాంతాల్లో ఇలాంటి లక్షణాలను ‘దయ్యం మనిషిని లేవకుండా కిందకు నెట్టేస్తోంది’ అని భావిస్తుంటారు. మెక్సికోలో అయితే, ‘మరణమే మనిషిపై కూర్చుని ఉంది’ అని చెప్పుకుంటుంటారు. అక్కడి ఆచారాల ప్రకారం పూజలు పునస్కారాలు కూడా చేస్తుంటారు. 

             నిద్ర పోకపోవడం వల్ల వచ్చే రోగాలతో పాటు ఇలాంటి నిద్రరోగాలు కూడా మనుషులను వేధిస్తున్నాయి. ప్రస్తుతకాలంలో సోషల్ మీడియా ప్రభావం ఎక్కువయి మనిషి నిద్రకు దూరం అవుతున్నాడు. నిద్ర రోగాలను ఎలాగూ ఆపలేము కానీ నిద్ర పోకపోవడం వల్ల వచ్చే రోగాలను ఆపడం మన చేతుల్లో పని. అందువల్ల సమయానికి నిద్రపోయి ఆరోగ్యాన్ని కాపాడుకుంటే కళ్లకు హాయి... ప్రాణానికి హాయి.

         ➡ దేవుడు నీకు అప్పగించిన పని మరచిపోయి యోనాలా నిద్రపోతున్నవా స్నేహితుడా?....

మరి దేవుని రక్షకునిగా అంగీకరిస్తావా?
అంగీకరించి నట్లయితే నిద్రలో నుండి మొల్కొని ప్రార్ధించు. అప్పుడు నీవు నిద్రపోయిన ఆయనే సురక్షితముగా నివసింపజేయును.

*యెహోవా, నెమ్మదితో పండుకొని నిద్రపోవుదునునేను ఒంటరిగా నుండినను నీవే నన్ను సురక్షితముగా నివసింపజేయుదువు.కీర్తనలు 4:8*

ఎందుకంటే మనల్ని కాపాడే దేవుడు కునకడు, నిద్రపోడు కీర్తన 121:4

ప్రభువైన యేసుక్రీస్తు కృపయు దేవుని ప్రేమయు పరిశుద్ధాత్మ సహవాసమును మీకందరికిని తోడైయుండును గాక ఆమెన్!
May God bless you all..
దేవుడు మిమ్మును బహుగా దీవించును గాక. ఆమెన్.
▪ CHRIST TEMPLE-PRODDATUR ▪